Մեր ունեցած տեղեկությունների համաձայն` Եվրամիության հետ ասոցացման համաձայնագիրը չի հրապարակվում այն պատճառով, որ այդ համաձայնագրում առկա կետերից մեկի համաձայն` եթե Հայաստանը ստորագրում է ասոցացման համաձայնագիրը, ապա մեր երկիրն այլ ձևաչափով որևէ տեղ որևէ այլ տնտեսական ալյանսի չի կարող անդամակցել:

Քիչ առաջ այս տեղեկությունը ներկայացնելով ՀՀ արտաքին գործերի նախարարության մամուլի քարտուղար Տիգրան Բալայանին, հարցրեցինք` ինքը տիրապետո՞ւմ է վերոնշյալ տեղեկությանը, կարո՞ղ է այն հերքել կամ հաստատել:

‹‹Ես չգիտեմ այդ աղբյուրները որտեղից են, բայց ժամանակը կգա, տեքստը կհրապարակվի: Ընդհանրապես, նման տեքստերի հրապարակումը նախատեսված է մեր օրենսդրությամբ, ‹‹Միջազգային պայմանագրերի մասին›› ՀՀ օրենքում հստակ ամրագրված է, թե Հայաստանի կողմից ստորագրվող պայմանագրերը երբ են հրապարակվում: Ըստ կարգի կհրապարակվի, արդեն ամեն ինչ պարզ կդառնա››:

Մեր հարցին, թե, այդ դեպքում, զուտ վերոնշյալ դրույթի առկայության մասով ինքը չի՞ կարող հերքել կամ հաստատել մեր ունեցած տեղեկությունը, Տիգրան Բալայանն ասաց.

‹‹Ոչ, չեմ մեկնաբանում չհրապարակված պայմանագրի տեքստը››:

Nyut.am