Արարատյան թեմի առաջնորդական փոխանորդ Նավասարդ արքեպիսկոպոս Կճոյանը աշխատանքից ազատել է Արարատյան թեմի Արարատ երիտասարդաց միության նախագահ Տեր-Հակոբ քահանա Խաչատրյանին։Մեր տեղեկություններով՝ պատճառը հուլիսի 7-ին Հ 2 հեռուստաընկերությամբ եթեր հեռարձակված «Չենք սպասում» հաղորդման ժամանակ ֆոտոլրագրող Գագիկ Շամշյանի մի արտահայտությունն է եղել։ Գագիկ Շամշյանը հաղորդման ընթացքում պատմել է Երուսաղեմ կատարած իր ուխտագնացության մասին, որի ղեկավարը եղել է Տեր Հակոբը։ Շամշյանը վերջում ասել է՝ «Տեր- Հակոբը 1000 Կճոյան արժի»։
Այս հաղորդումից հետո ոմն Արմեն, ում ճանաչում են որպես “խինկալիանոցի Արմեն”, տարբեր տեղերում ասել է, որ ինքը մտերիմ է Կճոյանի հետ, եւ Գագիկ Շամշյանի այդ արտահայտությունը չի մարսվելու։ Իսկ երկու օր առաջ արդեն նույն “խինկալիանոցի Արմենն” արդեն հաղթանակած տոնով ազդարարել է. “Տեր Հակոբի հարցերը լուծված են, նա շուտով կթռնի”։
Ինչպես տեսնում ենք, արդեն պարզ դարձավ, որ “խինկալիանոցի Արմենը” հենց այնպես չէր հոխորտում։
Առաջնորդական փոխանորդի հրամանից հետո, նրան են այցելել Արարատ երիտասարդաց միության անդամներն ու հոգաբարձուները, ովքեր Կճոյանից ցանկացել են տեղեկանալ Տեր- Հակոբի ազատման պատճառների մասին։
hayeli.am–ը կապվեց Արարատյան միության լրագրողների խմբի ղեկավար Նաիրա Պողոսյանի հետ, ով հաստատեց, որ Տեր Հակոբ քահանան ազատված է։ Նրանք հանդիպել են Կճոյանի հետ, փորձել են հասկանալ հրամանի պատճառը, իսկ Կճոյանը պատասխանել է. “Եթե ես ձեզ ասեմ պատճառը, կնշանակի, թե ես ձեզ բացատրություն եմ տալիս։ Իսկ ես բացատրելու խնդիր չունեմ։ Եվ առհասարակ, ինձ չի հետաքրքրում, թե ինչ են իմ մասին գրում ու խոսում”։
Միության անդամներն ու հոգաբարձուները փորձել են ներկայացնել, որ անժխտելի է Տեր Հակոբի մեծ ներդրումն ու վաստակը միության կայացման գործում, ինչը չի ժխտել Կճոյանը, սակայն հակադարձել է, թե՝ “Եկեղեցին անձերով չի պայմանավորված”։
hayeli.am–ը կապվեց նաեւ Շամշյանի հետ, ով հաստատեց իր վերոհիշյալ արտահայտությունը եւ պնդեց, որ, այո, Տեր Հակոբը իսկական հոգեւորական է եւ եթե Կճոյանը ինչ–որ հարցեր ունի, ապա թող ոչ թե Տեր Հակոբի հետ հաշվեհարդար տեսնի, այլ՝ իր՝ Գագիկ Շամշյանի հետ։