| Հուլիս 12 2013 «Օֆշորային խայտառակությունը ողջ տրամաբանող մարդկության շուրթերով աղերսում է, ասում է` ձեր ցավը տանեմ, օֆշորներում փողեր եք լվանում, հասկացանք, բայց գոնե ձևակերպումներում ճիշտ եղեք»,- 168.am-ի հետ զրույցում ասաց ՍԴՀԿ նախկին անդամ Գուրգեն Եղիազարյանն` անդրադառնալով վարչապետ Տիգրան Սարգսյանի անվան շուրջ ստեղծված օֆշորային պատմությանը: «Օֆշորը մեր հին Երևանի Մարքսի փողոցի բաղնիքի քիսաչու գործարքը հո չի՞: Օֆշորում, ճիշտ է, մեծ գումարներ են լվացվում, բայց արի ու տես, որ ձևակերպումը հասարակ բան է` փողեր ես լվանում, քո անվան տակ ձևակերպի: Հայտարարություններ  եղան, չէ՞, որ եթե էս սկանդալը հասնի Եվրոպա, Հայաստանի իմիջի վրա լուրջ ազդեցություն կունենա, ու հետո ներդրումային ծրագրերը կնվազեն, որովհետև վարչապետ կոչվածն օֆշորում գործարքներ է անում…»,- նշեց նա: Անդրադառնալով այն տեսակետներին, թե Տիգրան Սարգսյանն այնքան «միամիտ» չէր գտնվի, որպեսզի իր անունով օֆշորային գոտում ձեռնարկություն բացեր, Գուրգեն Եղիազարյանն արձագանքեց. «Իրենք իրենց արարքները բացահայտում են: Գործարքն արված է, գրանցված է… Եթե միամիտ չէր, գլուխն աշխատում էր, բա էդ Աշոտ Սուքիասյա՞նը, որը գործի հետ կապ չունեցող մարդ էր: Մեկը պետք էր, որ հերն անիծեին` վրեն բարդեին, ու Աշոտ Սուքիասյանն այս շախմատային պարտիայի միայն զինվորն է, որին շատ հանգիստ զոհաբերեցին, որ 34 մլն դոլար աշխատեն: Բա որ վարչապետը չի բացել, ո՞վ ա բացել. այլմոլորակայինները եկան՝ նրա անունով բացեցի՞ն: Վաղը-մյուս օրը Սերժ Սարգսյանի անունով էլ հաշիվ կբացեն: Ալիևը հարուստ է, մի 10 մլն Ս. Սարգսյանի անունով Ալ Քաիդայի հաշվին փող կփոխանցի, հետո կասեն, թե գումարներ է դնում, վերցնում»: Միաժամանակ Գուրգեն Եղիազարյանը չբացառեց, որ կեղծ փաստաթղթերով, կեղծ լիազորագրերով, էլեկտրոնային ստորագրմամբ «ֆանտաստիկ պայմաններում» հնարավոր էր վարչապետի անունով ձեռնարկություն գրանցել, բայց, ըստ նրա՝ հաշիվներ փոխանցել չէր կարող: «Հայրապետյանն ասում է, որ վարչապետի ու Կճոյանի հետ ծանոթացել է Աշոտ Սուքիասյանի տանը… սա էլ է պատահական եղե՞լ: Այսքանից հետո Տերտերն ասում ա՝ կապ չունեմ, հանկարծակիի եմ եղել… Այս պատմության բոլոր մասնակիցներին բանտախուց իջեցնելու համար մի քանի օր է պետք նորմալ երկրներում»,- ասաց նա՝ հավելելով, թե հետագայում Կիպրոսից մեկին կգտնեն ու գործը «կբարդեն վրան»` թյուրիմացություն անվան տակ:

Ամբողջական հոդվածը կարող եք կարդալ այս հասցեով՝ http://168.am/2013/07/12/248774.html
© 168 Ժամ առցանց լրատվական կայք