2013-02-04 13:40:08

Այսօր մեկնարկեց 5-րդ գումարման Ազգային ժողովի 3-րդ` գարնանային նստաշրջանը, և քանի որ գրանցված էր 110 պատգամավոր, այսինքն՝ կար քվորում, նիստը հայտարարվեց բացված՝ ՀՀ պետական օրհներգի ներքո, որը կիսատ հնչեց:

Աժ նախագահ Հովիկ Աբրահամյանը ներկայացրեց երրորդ նստաշրջանում քննարկվող հարցերի օրակարգը: Նա հայտնեց, որ ԱԺ բնապահպանության մշտական հանձնաժողովը բացասական եզրակացություն է տվել «Ժառանգություն» խմբակցության կողմից ներկայացված «Թեղուտի պղնձամոլիբդենային հանքավայրի շահագործման թույլտվության օրինականության վերաբերյալ» ժամանակավոր հանձնաժողով ստեղծելու մասին նախաձեռնությանը: Այն քվեարկությամբ՝ 65 դեմ, 16 կողմ, մերժվեց նաև ԱԺ-ի կողմից:

«Ժառանգություն» խմբակցության պատգամավոր Զարուհի Փոստանջյանն էլ, հարց հնչեցնելու ժամանակ խոսելով Սերժ Սարգսյանի մասին և դիմելով խորհրդարանի նախագահ Հովիկ Աբրահամյանին, ասաց՝ ձե՛ր նախագահը։

Այս արտահայտությանն արձագանքելով՝ ԱԺ նախագահն ընդգծեց. «Ոչ թե ձեր, այլ Սերժ Սարգսյանը բոլորի՛ս նախագահն է»։

Զարուհի Փոստանջյանն էլ հակադարձեց՝ բոլորիս նախագահը չէր կարող ստորագրել հայ–թուրքական խայտառակ արձանագրությունները. «Միայն ժողովրդի թշնամին կարող է նման արձանագրություն ստորագրել»,–հայտարարեց Զարուհի Փոստանջյանը։

Ի պատասխան՝ ՀՀԿ–ի շարքից հնչեց. «Ժողովրդի առաջին թշնամին դո՛ւ ես»: