Հայ գործարարի 1մլն դոլարը մնաց «Մոնտե Կարլոյում»

Լրագրողի մասնագիտությունն այնպիսին է, որ անգամ ամառային արձակուրդի ընթացքում քաղաքական գործիչներն ու գործարարներն իրենց «համեստ» և «պարկեշտ» պահվածքով մեր աչքից չեն վրիպում:

Տարօրինակ է, բայց փաստ է, Մոնակոյում Հայաստանը ճանաչում են որպես OIL-ի կամ Petrol-ի երկիր:

Առաջին հայացքից, որպես հայ` անակնկալի ես գալիս, թե երբ մեր հարստությամբ աչքի չընկնող երկիրը Մոնակոյում Oil-ի կամ Petrol-ի երկիր համարվեց:

Առաջին մի քանի օրը ոչ մի կերպ չես կարողանում գտնել այդ առեղծվածի գաղտնիքը, թե որտեղից է մարդկանց մոտ այդպիսի տպավորություն ստեղծվել, այն էլ այն դեպքում, երբ Հայաստանը զուրկ է վառելիքի բնական պաշարներից:

Սակայն այս առեղծվածը բացահայտելու համար մեզանից շատ ժամանակ չպարզվեց:

Բանն այն է, որ բոլոր հայ մեծահարուստները, օլիգարխները, պաշտոնյանները իրենց հանգիստն ու վայելքներն անցկացնում են Մոնակոյի ամենաթանկարժեք հյուրանոցներում, խաղատներում, ռեստորաններում, հանգստյան տներում և բոլոր հնարավոր ժամանցի վայրերում: Այս ամենը մի քանի օր անընդմեջ տեսնելուց հետո, ակամայից որպես հայ սկսում ես մի տեղ կասկածել` միգուցե Հայաստանն իսկապե՞ս Oil-ի և Petrol-ի երկիր է:

Մոնակոյում ամենաթանկարժեք ժամանցն անցկացնող մեր գործարարների ու պաշտոնյաների անունները թվարկելու կարիք, կարծում ենք, չկա, չնայած որ կարող էինք և նշել, թե ինչպես էին խաղատներում միանգամից 1մլն դոլար պարտվում:

Այնուամենայնիվ, Մոնակոյում չես կարող տեղացուն որևէ կերպ բացատրել կամ հասկացնել, որ Հայաստանն ամենևին էլ Oil-ի կամ Petrol-ի երկիր չէ, ավելին մի երկիր է, որտեղ առկա են սոցիալական և տնտեսական շատ լուրջ խնդիրներ, մի երկիր է, որտեղ դեռևս գոյություն ունի «աղետի գոտի» հասկացությունը, և ամենակարևորը մի երկիր է, որ այդ նույն Oil-ն ու Petrol-ը ստիպված է լինում թանկ գներով գնել այլ պետություններից: Բնական է, որ Մոնակոյի բնակիչներին թվարկված խնդիրներն ամենևին էլ հավատ չեն ներշնչի, քանի որ վերջիններս հակված են հավատալ իրենց աչքի տեսածին և այն հային, ով իրենց պետությունում պատրաստ է միլիոններ ծախսել` հանուն իր վայելքների:

Հ. Գ. Ի դեպ, մեր տեղեկություններով վերջին օրերին Հայաստանի խոշոր գործարարներից մեկը Մոնակոյի հանրահայտ «Մոնտե Կարլո» խաղատանը 1մլն դոլար է պարտվել: