Սիրիայի Քեսաբ հայաբնակ շրջանի Դյուզաղաջ գյուղի բնակչությունը գիշերը հայտնվել է օրհասական վիճակում, երբ սիրիական կառավարական ուժերը հիմնականում գործում էին հարավային ուղղությամբ իսկ վարձու զինված տեռորիստները հարձակվել էին հայկական գյուղին մերձակա Ֆրընլըխ զինվորական հենակետի վրա:

Ինչպես հայտնում է Tert.am գործակալությունը, գյուղացիները կանանց և երեխաներին հասցրել են տեղափոխել Քեսաբի այլ գյուղեր, իսկ տղամարդիկ անցել են դիմադրության: Թուրքիայի սահմանին գտնվող Դյուզաղաջի բնակչության մեջ միայն մի քանի ընտանիք է այլազգի:

Հայերի դիմադրության ընթացքում կառավարական ուժերը հասել են մարտերի տեղանքը, չեզոքացրել տեռորիստներին և դիրքավորվել թուրք-սիրիական սահմանի երկայնքով:

Մարտերի ընթացքում 3 զինվոր և մեկ քաղաքացիական անձ է զոհվել: Զոհերի թվում հայեր չկան: Զոհված անձը ալևի մուսուլման էր, սակայն շատ լավ տիրապետել է հայերենին:

Դյուզաղաջում ներկայում բնակվում է 45 ընտանիք, որոնցից 20-ը հայեր են: