07.23.2012 16:07 epress.am

Նույնասեռականների դեմ պայքարն արդարացնում են հայրենասիրությամբ. իրավապաշտպանը՝ Ծոմակի մասին

«Պինցետ» խմբի մենակատար Ծոմակի (Արմինե Օգանեզովա)՝ Հայաստանից հեռանալը անսպասելի քայլ չէր, քանի որ DIY բարի պայթեցումը ոչ միայն չդատապարտվեց, այլև խրախուսվեց ԱԺ որոշ պատգամավորների և ԱԺ փոխնախագահի կողմից: Այս մասին այսօր լրագրողների հետ հանդիպմանն ասել է իրավապաշտպան Ավետիք Իշխանյանը:

«Անհանդուրժողականություն կա այլ կրոնների հանդեպ, որը բերում է այդ համայնքների կղզիացման: Նույնը սեռական փոքրամասնությունների  դեպքում: Նրանց դեմ պայքարելով՝ խնդիրը մղում ենք ընդհատակ, այլ ոչ թե վերացնում ենք այդ մարդկանց: Ես պատկերացնում եմ՝ ինչ սպառնալիքներ է Ծոմակը ստացել, երևի նրա կյանքը անհնարին էր դարձել Հայաստանում: Մարդիկ պաշտպանված չեն մեր երկրում ֆեոդալներից, օլիգարխներից, ընտանեկան բռնություններից»,- ասել է իրավապաշտպանը:

Նրա խոսքով՝ միասեռականների դեմ պայքարը մարդիկ արդարացնում են հայրենասիրության պաթոսով, քանի որ օլիգարխների  կամ իշխանության մոտ կանգնած մարդկանց կողմից թույլ տրված անօրինությունների դեմ պայքարել  վախենում են:

Իրավապաշտպանը նկատել է նաև, որ շատ օրինազանցություններ հասարակությունը չի դատապարտում ոչ թե վախից կամ անզորությունից դրդված, այլ այն պատճառով, որ ունի կարծրատիպային մտածողություն: Ըստ Իշխանյանի՝  բռնաբարության զոհ դարձած մարդուն հասարակությունը արհամարհում է, մշտապես զոհի պիտակ տալիս, իսկ այդ հանցագործությունը կատարած մարդկանց հանդեպ անհանդուրժող չի գտնվում: Իրավապաշտպանը նկատել է նաև, որ նույնասեռականների մասին խոսելով`շատերը նրանց համամետում են Կոմայգու մարմնավաճառների հետ, ինչը, ըստ նրա, սխալ է:

«Ի դեպ, հավանական եմ համարում, որ միասեռականների մասին անհանդուրժողական մտքեր արտահայտողներ են հենց օգտվում այդ մարմանվաճառների ծառայություններից» ,- ասել է Իշխանյանը:

Ասուլիսի մեկ այլ բանախոս, բնապահպան Կարինե Դանիելյանի կարծիքով` Ծոմակը իր անձի շուրջ դիտավորյալ է աղմուկ բարձրացրել, որպեսզի հեշտ լինի Եվրոպական երկներում ապաստան ստանալը:  «Ես անհանդուրժող եմ սեռական փոքրամասնությունների քարոզչության հանդեպ, քանի որ դա դեմ է մեր ազգային և քրիստոնեական արժեքներին: Եթե քաղաքակակրթությունը գնում է ինքնաոչնչացման, ես համաձայն եմ, թող իմ ազգը հետամնաց լինի»,- ասել է Դանիելյանը: