Հայաստանի կրթության եւ գիտության նախարարությունը լուրջ խախտումներ է հայտնաբերել Երեւանի Վ. Բրյուսովի անվան պետական լեզվաբանական համալսարանում եւ առաջիկայում հրապարակելու է դրանք:

Ինչպես NEWS.am-ի թղթակցի հետ զրույցում նշեց ԿԳ նախարար Արմեն Աշոտյանը, ստուգումները տեղի են ունեցել նախքան համալսարանի ռեկոտր Սուրեն Զոլյանին խիստ նկատողություն հայտնելը: Մասնավորապես, ստուգումները տեղի են ունեցել մարտի 20-27-ին:

«Իմ կողմից ավելացնեմ, որ ընդհանրապես վերջին ամիսներին Սուրեն Զոլյանն աչքի էր ընկնում իր տարօրինակ պահվածքով: Ցավում եմ, որ իր անհամաձայնությունը հայտնելու արտահայտչամիջոցների մեջ նա անցել է բարեկրթության բոլոր սահմանները»,- նշեց Արմեն Աշոտյանը:

Ինչպես ավելի վաղ հայտնել էր NEWS.am-ը, Հայաստանի կրթության եւ գիտության նախարար Արմեն Աշոտյանի հրամանով Երեւանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանի նկատմամբ կիրառվել է կարգապահական տույժ՝ հայտարարվել է խիստ նկատողություն: Կարգապահական տուժը տրվել է այն բանի համար, որ վերջինս չի կատարել իր վերադասի հանձնարարականը, առանց հարգելի պատճառի բացակայել է երկրից, ոչ պատշաճ կերպով է կատարել իր ծառայողական պարտականությունները:

Ի պատասխան Սուրեն Զոլյանը մեր թղթակցի հետ զրուցյում հայտարարել էր, թե Արմեն Աշոտյանի հրամանը կարող է հավակնել Գինեսի ռեկորդների գրքում հայտնվելուն: Նա դիմել է դատարան եւ համոզված է, որ դատարանն անվավեր կհայտարարի այս անհեթեթ հրամանը: Ռեկտորը դիմելու է նաեւ վարչապետին, որպեսզի նա նախ վերացնի նշված հրամանը եւ որոշի Արմեն Աշոտյանի հետագա պաշտոնավարման նպատակահարմարությունը:

Ինչպես արդեն տեղեկացրել էինք, ՀՀ կրթության և գիտության նախարար Արմեն Աշոտյանը Երևանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանի նկատմամբ կարգապահական տույժ՝ խիստ նկատողություն հայտարարելու մասին հրամանագիր է ստորագրել։

Մեկնաբանելով այս դեպքը՝ լեզվաբանական համալսարանի ռեկտոր Սուրեն Զոլյանը «Առավոտ» օրաթերթի հետ զրույցում ասել է. «Առհասարակ ես ղեկավարվում եմ մի սկզբունքով՝ նախարարի մասին կա՛մ լավ, կա՛մ ոչինչ, հատկապես այն դեպքում, երբ նախարարը ոչնչություն է։ Իսկ ինչքանով է դա կարող վերաբերել գործող նախարարին՝ այդ մասին թույլ տվեք չմանրամասնել»։

Զոլյանի խոսքերով՝ Աշոտյանը գերազանցել է իր լիազորությունները, քանի որ մասնակցել է Տարածաշրջանային լեզուների Եվրոպական խարտիայի փորձագետների նիստին այն օրերին, երբ Հայաստանից բացակայելու համար սահմանվել է կարգապահական տույժ։ Զոլյանն ասել է, որ Կառավարության անդամները չեն կարող միջամտել Խարտիայի նիստին։

«Առավոտը» գրում է, որ Զոլյանը պատրաստվում է դիմել դատարան՝ պահանջելով չեղյալ համարել նախարարի որոշումը։ Զոլյանը նաև մտադիր է դիմել ՀՀ վարչապետ Տիգրան Սարգսյանին, որպեսզի վարչապետն առաջին հերթին չեղյալ համարի այդ հրամանը և դիտարկի Արմեն Աշոտյանի հետագա պաշտոնավարության նպատակահարմարությունը։