նը
Բելգիայի Արեւմտյան Ֆլանդրիա շրջան Մենեն քաղաքում հայ կինը փրկել է բելգիական ընտանիքին: Այդ մասին, դեկտեմբերի 8-ին, գրել են Բելգիայի բոլոր թերթերը:

Միջադեպը տեղի է ունեցել դեկտեմբերի 7-ի լույս 8-ի գիշերը, երբ քաղաքի կենտրոնական հատվածում գտնվող տներից մեկում հրդեհ է բռնկվել: Թերիների ընտանիքն այդ ժամանակ քնած է եղել: Բելգիացիները նկատել են հրդեհը, երբ կրակը հասցրել է տարածվել նկուղում եւ հասնել առաջին հարկ եւ երկրորդ հարկի մի հատվածին: Տանն իրարանցում է սկսվել, տանտիրուհին` Նատաշա Թերին փորձել է փրկել իր չորս անչափահաս երեխաներին: Օգնության կանչերին չեն արձագանքել հարեւաններից եւ ոչ մեկը… բացի դիմացի տանն ապրող հայ Վերժինե Հակոբյանից:

Կինը նախ զանգահարել է հրշեջ ծառայություն, այնուհետեւ արթնացրել է ամուսնուն եւ երկու երեխաներին: «Իմ երեխաները` Մարիաննան եւ Էդգարը, ինչպես նաեւ ամուսինս, մենք ողջ ընտանիքով հասանք հարեւաններին օգնության»,- պատմել է Հակոբյանը: Հայերն օթեւան են տվել Թերիների ընտանիքին այնքան ժամանակ, մինչեւ հայտնվել են ազգականները:

Արդյունքում երեխաները փրկվել են: Այս պահի դրությամբ նրանք հիվանդանոցում են: Նշվում է, որ վերջին պահին Նատաշա Թերին ստիպված է եղել թռչել այրվող տան երկրորդ հարկից: Կինը ծանր այրվածքներ եւ կոտրվածքներ է ստացել: Այս պահին նա գտնվում է վերակենդանացման բաժանմունքում: Տունն ամբողջությամբ այրվել է, Ճշտվում են հրդեհի բռնկման պատճառները:

Այս միջադեպին անդրադարձել են գրեթե բոլոր բելգիական թերթերը: Տեղական որոշ պարբերականներ այդ ֆոնին անդրադարձել են Բելգիական թագավորության միգրացիոն քաղաքականությանը, նշելով, որ չի կարելի համեմատել հայերին ծայրահեղական մուսուլմանների հետ: Նշենք, որ Մենենում բնակվում է մոտ 100 հայ ընտանիք: