Սլովակիայի հայկական համայնքի ղեկավար Աշոտ Գրիգորյանը հայտնում է, որ երկուշաբթի օրը նրա գրասենյակ են այցելել «Սլովակիայի ֆուտբոլի մի շարք պատասխանատու անձիք», որոնք հայտնել են, որ կասկածներ կան, որ Իռլանդիա-Հայաստանի խաղը սպասարկող իսպանացի մրցավար Գոնսալեսը կարգադրություն է ստացել հանդիպումը վարել հօգուտ իռլանդացիների։
«Պատճառը բացատրվում էր նրանով, որ Եվրոպայի ֆուտբոլի ֆեդերացիան պարտք է Իռլանդիայի հավաքականին, 2010թ-ի աշխարհի առաջնության եզրափակիչի ուղեգիր ձեռք բերելու ճանապարհին, Ֆրանսիայի հավաքականի հետ խաղի ժամանակ տեղի ունեցած անարդարության համար: Այդ խաղի ժամանակ հայտնի ֆրանսիացի հարձակվող Թերի Անրին ակնհայտորեն ձեռքով էր խփել գոլը, որը դատավորի կողմից գրանցվել էր որպես մաքուր խաղ»,- նշում է Գրիգորյանը: Նա հայտնում է, որ փորձել է իր իմացածի մասին երեկ տեղյակ պահել Հայաստանի ֆուտբոլի ֆեդերացիայի ղեկավարությանը, սակայն ապարդյուն, քանի որ «նրանց բջջայիններն անջատված են եղել օրվա ընթացքում»:

Հիշեցնենք, որ երեկ Դուբլինում Իռլանդիա-Հայաստան ֆուտբոլային հանդիպումն ավարտվեց 2։1 հաշվով։ Բազմաթիվ ֆուտբոլային մեկնաբաններ ու ֆուտբոլասերներ խաղի մրցավարությունն անարդար են համարում։