«Հայկական ժամանակ». Ոստիկանությունում քննիչները ցուցադրական ազատման դիմումներ են գրել

Ապրիլ 14, 2011

Հայաստանի ոստիկանության քննչական գլխավոր վարչության քննիչների շրջանում ծայր առած դժգոհությունները սպառնում են վերաճել լայնամասշտաբ բողոքի ալիքի, որի արդյունքում ոստիկանությունը կարող է մնալ առանց քննիչների, քանի որ նրանց մեծ մասը սպառնում է ազատման դիմում գրել եւ աշխատանքից դուրս գալ, գրում է «Հայկական ժամանակ» թերթը:

Պարբերականը նշում է. «Ինչպես հայտնի է, քննիչների դժգոհության ալիքի բարձրացման պատճառը եղել է ՀՀ ոստիկանության քննչական գլխավոր վարչության ՀԿԳ քննիչ Վահան Խանզադյանին ապրիլի 11-ին կալանավորելու փաստը: Քննիչներին զայրացրել է այն հանգամանքը, որ ոստիկանության ղեկավարությունը որոշել է «պլանը» կատարելու համար որպես քավության նոխազ օգտագործել քննիչին: Խանզադյանը մեղադրվում է դեռեւս 2009-ին Գավառում 3 հոգու դեմ մահափորձ կատարելու փաստի առիթով հարուցված քրգործի ընթացքը սխալ տանելու, հանցագործներին չբացահայտելու եւ քրեական գործը կասեցնելու մեջ: Սակայն, մեր տեղեկություններով, քրեական գործի մանրամասներին ծանոթ մեր գործընկերները վստահ են, որ տեղի ունեցածի համար Խանզադյանը մեղավոր չէ, քանի որ նա պատշաճ կատարել  իրեն վերապահված գործառույթները: Քննիչները համոզված են, որ հանցագործների պարտակման խնդիրը լուծվել է օպերատիվ-հետախուզական միջոցառումների իրականացման ընթացքում:

Տեղի ունեցածից հետո քննիչները հասկացել են, որ նույն հաջողությամբ իրենցից յուրաքանչյուրը կարող է հայտնվել Խանզադյանի տեղում: Ոչ ոք չի կարող ասել, թե քննիչներից ով կլինի քավության նոխազը, եթե ասենք Սերժ Սարգսյանը մի օր որոշի կրկին գնալ ոստիկանություն եւ այդ համակարգի ղեկավարներից որեւէ մեկին անվանի անբարոյական»,- գրում է թերթը:

Պարբերականի տեղեկություններով, քննիչները ոստիկանության քննչական գլխավոր վարչության շենքում ցուցադրական ազատման դիմումներ են գրել, բայց մուտք չեն արել, սպասելով իրենց ղեկավարության արձագանքին: «Բայց երեկ հայտնի է դարձել, որ ՀՀ ոստիկանության ղեկավարությունը մտադիր չէ «նահանջել»` նախընտրել է քննիչներին սաստել հակընդդեմ սպառնալիքներով: Արդյունքում քննիչները կազ կոմիտեի պես ինչ-որ մարմին են ստեղել, որպեսզի գործեն համախմբված: Եթե խնդիրն ինչ-որ կերպ չլուծվի, ապա բացառված չէ, որ 100-ից ավելի քննիչներ միաժամանակ ազատման դիմում ներկայացնեն, որից հետո ՀՀ ոստիկանությունը կարող է մնալ առանց քննիչների»,- գրում է թերթը: