Ինչպես HayNews.am-ին փոխանցում է ԱՄՆ-ի իր թղթակիցը, Հոլիվուդում գտնվող «Yerevan Travel» տուրիստական գործակալության աշխատակից ոմն Ալվարդը վերցրել կազմակերպության գումարների մի մասը և անհետացել:
Լոս Անջելեսում բնակվող Նվարդ Քյուփելյանի խոսքերով, մոտ 3 ամիս առաջ նրանք «Yerevan Travel»-ում ինքնաթիռի տոմսեր են պատվիրել` Հայաստան գալու համար:
«14 տարի Երևանում չէինք եղել, մինչև վերջին կոպեկը խնայել էի, որ քրոջս և երեխայիս հետ գայինք Հայաստան: Շատ էի կարոտել:
Գնացի «Yerevan Travel» կազմակերպություն, ուր և տոմսեր պատվիրեցի: Ալվարդն ասաց, որ փողը cash պետք ա տամ:
Ճիշտն ասած` մոտս կասկած առաջացավ, թե ինչի cash-ով, բայց այնքան էի ոգևորվել Հայաստան գալու ցանկությամբ, որ ինքս ցրեցի իմ կասկածները:
Անցավ երեք ամիս, մեկ էլ իմանամ, որ էդ կազմակերպությունը փակվել ա: Ծանոթների միջոցով ճշտեցի, որ Ալվարդ կոչվածը փողերը վերցրել և փախել ա»:
Նվարդը պատմել է, որ Ալվարդն ընդամենը պատվիրել է տոմսերը` գումարը չի փոխանցել, իսկ մի քանի օր հետո չեղյալ արել պատվիրված տոմսերը:
Ըստ մեր տվյալների, այս պահին մի քանի տասնյակ մարդիկ «քաշվել են» այդ խաբեությունից արդեն Հայաստանում: Նրանք Երևանի օդանակավակայանում են միայն իմացել, որ իրենց հետդարձի տոմսերն անվավեր են:
Նվարդը պատմում է, որ իր ծանոթներից մի քանի հոգի կորցրել են նաև իրենց գործատեղերը, որովհետև Հայաստանից չեն կարողացել վերադառնալ ճիշտ ժամանակին:
Ի դեպ, Նվարդն ու իր ընկերները ԱՄՆ-ում դիմել են ոստիկանություն, սակայն այնտեղ նրանց խորհուրդ են տվել վարձել փաստաբան և դատի տալ, որովհետև «դեռ պետք է ապացուցվի, որ այս պատմության մեջ կրիմինալ կա»: