Հոդվածագիրը պատմում է, որ մեկ ամսվա ընթացքում շրջել է քաղաքի մի շարք սրճարաններով եւ կրկին զայրացել: «Բաքվում մեծ անուն վայելող «Պանորամա» սրճարանում երեկոյան ժամերին հնչում է Առնո Բաբաջանյան, իսկ «Հազար ու մեկ գիշեր» սրճարանում ամենապահանջվածը Շառլ Ազնավուրի երգերն են: Այս բեմում Ազնավուրի երգերը կատարում է երիտասարդ երգչուհի Մարիամ Շաբանովան» ( «Ազգը» մի քանի ամիս առաջ գրել էր, որ Ազնավուրի երգերը կատարելու համար Շաբանովային արգելել են մասնակցել «Եվրոտեսիլ» մրցույթ-փառատոնին-):

Հոդվածագրին հայկական երգերի ներկայությունն այնքան է բարկացրել, որ մինչ «լրագրողական պարտքը կատարելը» նա դիմել է նախ ռեստորանների մենեջերներին, սակայն ցանկալին չլսելով` դիմել քաղաքային իշխանություններին: Մի շարք ռեստորանների եւ սրճարանների տնօրենների զրույցը ավարտվել է լրագրողի համար ոչ ցանկալի վերջաբանով: Rio Grande սրճարանի տնօրենն ասել է, որ այցելուների մեծ մասը պատկառելի թեյավճար են թողնում, հետեւաբար իրենք չեն կարող հրաժարվել հայկական ռաբիս երաժշտությունից: «Հազար ու մի գիշեր» սրճարանի տնօրենն էլ ասել է, որ բաքվեցիները նախընտրում են այցելել իրենց սրճարանը բացառապես Ազնավուրի երգերը լսելու համար: «Նրանք հայկական երաժշտության շնորհիվ գումարներ են աշխատում, առանց ամաչելու, որ դա մեր թշնամու երգն է», գրում է հոդվածագիրը: Քաղաքապետի լիազորի` լրագրողին ուղղված նամակում գրված է, որ վերոնշյալ ռեստորանները համարվում են հարկատուներ, իսկ քանի որ նրանց եկամտի աղբյուրը երաժշտությունն է, իրենք չեն կարող այս պահին միջոցներ ձեռնարկել, հաշվի առնելով տնտեսական խնդիրները:

Լրագրողը հոդվածով իր զայրույթն ու վրդովմունքն արտահայտելով չի սահմանափակվել: Նա Bakililar.az կայքում եւ Facebook սոցիալական ցանցում կազմակերպել է ստորագրահավաք: Նպատակն է` ստորագրությունները հանձնել քաղաքային իշխանություններին, սպառնալիքով, որ չեն այցելի վերոնշյալ ռեստորանները, եթե այնտեղ չդադարի հնչել հայկական երաժշտությունը: